wrapper

الطفولة الروحية

إعداد الخوري يوسف بركات
"أعترف لكَ، يا أبتِ، ربّ السماء والأرض، لأنّك أخفَيْتَ هذه الأمور عن الحكماء والفهماء، وأظهرتها للأطفال".
غريب تصرّف الرب يسوع عن منطقنا، ورأيو بيعاكس رأينا وفكرنا لِمِّن بيحكي عن الأطفال. فالإنسان، مِن صغرو، بيحلم إنو يصير كبير، عندو عالمو وبيتو ومستقبلو واستقلاليتو عن أهلو. والطفل بيحلم كتير وعندو طموحات كتيرة، بينطر تا يكبر تا يبلّش يحقّق هالأحلام وهالطموحات. والأطفال كمان ما حدا بياخد أحاديثن ومداخلاتن على محمل الجد، لأنن بيعتبروهن بعدن ما بيفهموا بأمور الحياة، بس لِمِّن بيكبرو بيصير العالم بيصغيلن بانتباه حتى لو كانت الأفكار ذاتا من سنين. ميشان هيك بيصير الولد الصغير يعيش فترة من عمرو عم يطلّع كيف بدّو يوصل لعالم الكبار. وهون الرب يسوع عم بيأكّدلنا إنّو عالم الأطفال هوي الأفضل.
بس بالواقع الرب يسوع ما بيريدنا نضلّ أطفال ولا تكون تصرّفاتنا ولاّدية، لا بل بيريدنا إنو نكبر وننما متل ما هوّي كبر ونما بالقامة والحكمة والنعمة، بس كمان نحافظ بالوقت ذاتو عا روح الطفولة أو بالأحرى عالطفولة الروحية.
هالطفولة الروحية عاشها كتير من القديسين والمفكّرين من خلال بساطة العيش بحياتن، ومن خلال ثقتن بي الله، ومن أشهر القديسين فرنسيس الأسيزي. هالقديس اللي كان كل ما كبر بالسن، كل ما عرف إنو يكون طفل يحب الخليقة ويحب إخوتو البشر ويعبد الله بي بساطة. واللي رغم مرضو وألمو، عرف يتغنّى بجمال الله ويسبّحو بخليقتو. سبّحو بالشمس اللي هي "النهار... وفيه بينوّر الرب حياتنا".
وكان يشكر الرب عا نور الشمس وقت اللي ما كان فيه، ولو للحظة، يتحمّل أشعة الشمس. كما سبّح الرب بكل الإشيا خاصة بالموت اللي هوّي الباب اللي فيه بيفوت الإنسان عا ملكوت الله.
نحنا مدعوّين نعيش الطفولة الروحية عا مثال كل القديسين ونسبّح الله ونوثق فيه ثقة الابن ببيّو. ومهما اشتدّت ظروف الحياة علينا عنّا بَيّ عظيم، حاضر معنا وحاضنّا وما بيتركنا. دعوة الرب لإلنا إنو يكون عنا التواضع الكافي تا نسلّم ذاتنا لألله اللي خلقنا ودعانا إنو نسبّحو بكل عمل محبة منعملو وفيه منظهر مجدو للعالم من خلال عيشنا البساطة وبراءة الأطفال اللي بتتجلّى بالمحبة بي كل جوانبا، وأهمها محبتنا لخينا الإنسان اللي فيه منشوف المسيح. ومن محبتنا لإلو بتنمى محبتنا للرب يسوع وبي هالمحبة منكون عم نحضّر مكان لإلنا بي ملكوت الله مع الأبرار والصدّيقين.

Read 114 times